Mingəçevir və Yevlaxda zərərvericilərə qarşı mübarizəyə başlanılıb

Google+ Pinterest LinkedIn Tumblr +

Mingəçevirdə əkin sahələrinin çəyirtkəkimilərin hücumuna məruz qalması ilə bağlı Kənd Təsərrüfatı Nazirliyi yanında Aqrar Xidmətlər Agentliyinin Respublika Bitki Mühafizəsi Mərkəzi tərəfindən təxirəsalınmaz tədbirlər həyata keçirilməkdədir.

Nazirlikdən Biosfer.az-a verilən məlumata görə, artıq yaranmış vəziyyətlə bağlı Kənd Təsərrüfatı Nazirliyinə müraciət edən şəxslərlə Yevlax rayon Bitki Mühafizəsi Mərkəzinin mütəxəssisləri tərəfindən görüş keçirilib.

Onlarla birlikdə Kombinat və Qazandağ ərazilərində günəbaxan bitkisi əkilən 119 hektar sahəyə baxış keçirilib. Yayılan zərərvericinin yerli “Şala” növü olduğu müəyyən edilib. Aşkar edilən şalaların sürü əmələ gətirən xüsusi təhlükəli zərərli orqanizm olmadığı izah edilib. Buna baxmayaraq, kimyəvi mübarizə tədbirlərinin görülməsi ilə bağlı müvafiq qərar qəbul edilib.

Eyni zamanda Aqrar Xidmətlər Agentliyi tərəfindən müvafiq dərman vasitələri ilə təmin edilən mobil mühafizə dəstələri əraziyə ezam olunub. İyunun 8-dən etibarən həmin ərazilərdə fitosanitar müşahidə və kimyəvi mübarizə tədbirlərinə başlanılıb. Hazırda həmin ərazilərdə müvafiq tədbirlər həyata keçirilməkdədir.

Qeyd edək ki, uzun illərdir Mingəçevir və Yevlax ətrafı ərazilərdə çəirtkəkimilərin miqrasiyası və hərəkəti qeydə alınmayıb.

Cari ilin aprel ayının ikinci ongünlüyündən etibarən bu günə qədər respublika üzrə, ümumilikdə, 34 890 hektar sahədə çəyirtkəkimilərə (əsasən Mərakeş çəyirtkəsinə) qarşı kimyəvi mübarizə tədbirləri həyata keçirilib. Mübarizə tədbirləri İmişli (14400 ha), Saatlı (4630 ha), Sabirabad (1360 ha), Biləsuvar (5072 ha), Samux (1285 ha), Tovuz (4590 ha), Beyləqan (975 ha), Göygöl (833 ha), Hacıqabul (460 ha), Şəmkir (410 ha), Laçın (350 ha), Zərdab (263 ha), Kürdəmir (200 ha), Ağsu (50 ha) və Yevlax (12 ha) rayonlarını əhatə edib. Kimyəvi mübarizə zamanı “Arrivo 25 EC” və “Chrysamed Dedex” kimyəvi preparatlarından istifadə olunub.

Paylaş