Ağcabədidə zərərvericilərə qarşı kimyəvi mübarizə tədbirləri aparılır

Google+ Pinterest LinkedIn Tumblr +

Ağcabədi rayonunda karantin tətbiq edilən zərərvericilərə və alaq otlarına qarşı kimyəvi mübarizə tədbirləri davam etdirilir.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən Biosfer.az-a bildiriblər ki, Dövlət Fitosanitar Xidmətinin Respublika Bitki Mühafizəsi Mərkəzinin mütəxəssisləri tərəfindən əkin sahələrinin alaq otları ilə sirayətlənmə dərəcəsini müəyyənləşdirmək üçün karantin tətbiq edilən “Sarı sarmaşıq” və “Tikanlı quşüzümü” alaq otlarına fitosanitar müşahidə və mübarizə tədbirləri həyata keçirilib.

Belə ki, “Sarı sarmaşıq” alaq otuna qarşı 60 hektar sahədə müşahidə aparılıb, sirayətlənmə aşkar olunmuş 20 hektar sahədə mexaniki üsulla mübarizə tətbiq edilib.

Rayonun Hindarx qəsəbəsində, Hüsülü, Təzəkənd, Qiyaməddinli, Gələbəddin, Qaravəlli, Muğanlı, Sarvanlar və digər kəndləri əhatə edən 170 hektar əkin sahəsində müşahidə aparılıb və 40 hektar sahənin “Tikanlı quşüzümü” (Solanum rostratum Dun.) ilə sirayətləndiyi müəyyən olunub. 10 hektar sahədə isə alaq otu mexaniki üsulla yığılaraq yandırılıb. Həmçinin dövlət büdcəsi hesabına “Dicamba” tərkibli “Dicamin SL” (Dicamba+2,4 D Amin duzu) (1 L/ha) və “Qlyphosate” tərkibli “Herbogliph 480 SL” (2L/ha) herbisidi ilə çiləmə üsulu ilə kimyəvi mübarizə tədbirləri aparılıb. Hazırda mexaniki və kimyəvi mübarizə tədbirləri davam etdirilir.

Ağcabədi rayonunda xüsusi təhlükəli zərərverici hesab edilən siçanabənzər gəmiricilərə qarşı da fitosanitar müşahidə və mübarizə tədbirlərinə start verilib. 5000 hektar sahədə müşahidə aparılıb, 1500 hektar sahədə sirayətlənmə müəyyən edilib və 1100 hektar sahədə aqrotexniki üsulla mübarizə tədbirləri tətbiq olunub.

Həyata keçirilən mübarizə tədbirləri ilə yanaşı, ətraf kəndlərin sakinləri, fermerlər və təsərrüfat sahibləri ilə birlikdə müntəzəm maarifləndirmə tədbirləri həyata keçirilir, eləcə də zərərvericilərə və alaq otlarına qarşı mübarizə tədbirlərinin aparılması ilə bağlı müvafiq tövsiyələr verilir.

Qeyd edək ki, əkin sahələrinin zərərvericilər və alaq otları ilə sirayətlənməsi kənd təsərrüfatı bitkilərinin məhsuldarlığını azaldır, aqrotexniki tədbirlərin aşağı səviyyədə olduğu sahələrdə isə əkinlərin tam məhvinə səbəb olur, məhsulu zibilləyir və keyfiyyətini aşağı salır.

Paylaş